Halkee ayuu ku Dambeeyey Guddidii Tacliinta Sare ee Madaxweynuhu Magacaabay

Cabdiraxmaan Cadami

Bishii  August 2010 dhamaystirkii golaha wasiirrada ka dib Madaxweynaha Jamhuuriyada Somaliland Md. Axmed Siilaanyo wuxuu magacaabay guddiyo (Commissions) cusub oo hor leh oo aan wax faa’iido ah u lahayn  qaranka, balse kaliya culays ku haya miisaniyadda kooban ee dalka, hase ahaatee bulshaddu waxay u riyaaqday ama loo bogay magacaabistii Guddida Tacliinta Sare oo dalku baahi weyn u qabay in la helo hay’ad si gaar ah ugu xilsaaran ilaalinta tayda Tacliinta Sare si aanay jaamacadaha Somaliland uga hoos marin heerka jaamacadaha dalalka dunida saddexaad.

Muwaadin bal dhugo sheekadan gaaban: Guddoomiyihii hore ee Jaamacadda Hargeysa Md. Cabdi Haybe Cilmi wuxuu ka codsaday Jaamacadda Jomao Kenyatta inay ka damiinato aqoonsiga shahaadada Jaamacadda Hargeysa (accreditation). Si ay isaga hubiyaan in la dammaanad qaadi karo, waxay soo direen wefti ka kooban Shan professor, saddex bilood oo ay Hargeysa joogeen iyo baadhitaan qoto dheer ka dib warbixin hordhaca ah waxay ku sheegeen in Jaamacaddu 60% keliya buuxisay oo ay ka hoosayso heerkii laga rabay.

Qiimayntaa waxa innooga baxay oo aannu shaki ku jirin in jaamacadaha gaarka ahina ka heer hooseeyaan kuwa ay dowladdu taageerto. Haddaba, markii la ogaaday xil-gudosho la’aanta ama tamardarida Guddida Tacliinta Sare, waxa jaamacadaha qarkood ku dhawaadeen inay noqdaan sidii meherado lagu ganacsado oo kale, sidaa daraadeed iyagoo ku tartamaya ardayda dugsiyada sare ka soo baxa iyo inay tirada ugu badan ka helaan, waxay fududeeyeen shuruudaha ardaygu ku geli karo kuliyadaha kala duwan (admission), waxa la og yahay inay aqbalanaa shahaadooyin foojari ah ama indhaha laga qarsado iyaga oo garanaya, ma dafiri karno, mana is diidsiin karno in arday aan dugsiyada sare dhamaysan ay galaan jamacadaha.

Ardayda kala mustawaha ah ee is dhex fadhida waxay dhibaato kala kulma macallimiinta, waxa kale oo ay dulmi ku tahay kuwa soo dhamaystay waxbarashada dugsiga sare ee loo soo diyaariyay Waxbarashada Tacliinta Sare.

Dhinaca kale, Madaxda iyo Maamulada Jaamacadaha iyo cid kasta oo ay khusayso Somaliland ka aqbali mayso, suurtogalna maaha in dhowr kun oo sannad kasta jaamacadaha ka soo qalinjabiya aanay waxba ka dhicin ama ka hadhin, markaa haddii xaalada Tacliinta Sare sidan ku sii socoto waxay saamayn xun ku yeelan doontaa sumcada waxbarashadda Somaliland.

Runtii waxa jira dhallinyaro si la yaab leh wax ugu bartay dalka gudihiisa oo aad u dedaalay, iyaga oo adeegsanaya tiknoolajiyada casriga ah, sida Internet-ka oo kale, laakiin waxay noqonayaan tiro yar marka loo eego kumanaanka kun ee sannad kasta jaamacadaha ka soo qalinjabiya.

Su’aal: Maxay u shaqayn waayeen Guddida loo magacaabay Tacliinta Sare?

1. Ujeeddada loo magacaabay oo ka duwan magaca uu xambaarsan yahay oo ahayd in mansabyo ama mushahar badan loogu sameeyo qaar ka mid ah raggii qurbaha iyo dalka gudihiisaba kaga soo qamaamay madaxtooyada doorashaddii ka dib. 
2. Qaar ka mid ah dadkii la magacabay oo kaga mashquulay danahooda gaarka ah, waxay wakhti u waayeen shaqadii guddida 
3. Xubno ka mid ah guddida oo madax ka ah ama iska leh jaamacadaha qaarkood, sidaa awgeedna caqli gal maaha inay qiimeeyaan jaamacadaha ay tartanka ku wada jiraan 
4. Rag ka mid ah masuuliyiinta oo iska dhowra inuu godob u galo Qaranka ama Danta guud ee ummadda 
5. Waa Dabeecad aadamuhu iska leeyahay in aannu Guddidu ama qofku xil weyn iska saarin hawsha loo igmaday haddii aannu ka baqanayn in lagula xisaabtamayo.

Haddaba, haddii ay inaga dhab tahay in la wanaajiyo tayada Jaamacadaha dalkeenna, waxa loo baahan yahay in la raaco tallooyinkan iyo wixii kale ee lagu dari karo:-

1. In la magacaabo dad wakhti ku filan u heli kara hawlaha guddida oo dareen u leh xilka saaran 
2. In guddida laga saaro xubanaha madaxda ka ah Jaamacadaha dawladda iyo mulkiilayaasha kuwa gaarka ah si aanay isaga hor iman dantooda iyo danta guud 
3. In Wasaaradda Waxbarashadda iyo Tacliinta Sare laga furo xafiis laga bixiyo caddayn ah in ardayga sitaa u qalmo ama geli karo jaamacadaha dalka 
4. In 3 biloodba Guddidu is qiimeeyo ama la qiimeeyo waxay ka qabteen taynta Jaamacadaha.

Gabogabo: Ujeeddada qoraalku maaha in la xidho Jamacadaha dalka oo kama maarano, Ujeeddadu waxay tahay in aan laga warwareegin in ogolaanshaha laga la noqdo kuwa buuxin kari waayay 50% heerka looga baahan yahay Jaamacadaha ama u hoggaansami waaya xeerarka iyo amarada Guddida Tacliinta Sare ka soo baxa.

C/raxmaan Cadami

abdirahmanadami@yahoo.com

Source: http://jamhuuriyamedia.com/?p=3581